Wednesday, April 22, 2015

ከአይ ኤስ እኩል የማወግዛቸው …

በከበደ ካሳ
አይ ኤስ በፈፀመው ጭፍጨፋ ልቤ በሃዘን ደምቷል፣ ድርጊቱ የተፈፀመው በኢትዮጵያውያን ላይ መሆኑን ስሰማ ደግሞ ሃዘኔን ድርብ አድርጎታል፡፡ እናም ይህን አስነዋሪ ድርጊት በግሌ አወግዘዋለሁ፡፡ ፈጣሪ የሟቾችን ነፍስ በገነት ያኑርልን፣ ለወዳጅ ዘመዶቻቸውም መፅናናትን ይስጥልን።
በየትኛውም ሁለተኛ አገር በስደት መኖር በሰላም ወጥቶ በሰላም ስለመግባት ዋስትና አይሰጥም፣ ለሰው ልጅ በማይመጥን ኢሰብዓዊ አያያዝ ስር ሊጥል እንደሚችልም በቅርብ ጊዜያት በደቡብ አፍሪካ፣ በየመን፣ በሳውዲ አረቢያና አሁን በሊቢያ በዜጎቻችን ላይ የተደረጉ ጥቃቶች ማሳያ ናቸው። ነገ በሌሎች የተሻለ ህይወት ፍለጋ ከአገራቸው በተሰደዱ ዜጎቻችን ላይ ላይደገም ምንም ዋስትና የለንም። እናም ወገኖቻችን በያሉበት አገር ከመሰል ጥፋቶች እንዲጠበቁ ፈጣሪ እንዲረዳቸው እፀልያለሁ።
ይህን ሰይጣናዊ እርምጃ በማወግዘው ልክ ታዲያ ሁለት ነገሮችንም አወግዛለሁ፡፡ አንደኛው በማህበራዊ ድረ ገፆች የአይ ኤስን ድርጊት በአብነት በማንሳት በእስልምና እና በክርስትና እምነቶች መካከል ቁርሾ ለመፍጠር የሚተጉትን ነው። አንዳንዶች በዚህ እርምጃ አስታከው ያልተገራ ምላሳቸውን በእስልምና እምነትና በእምነቱ ተከታዮች ላይ ሲያውለበልቡ አይቻለሁ።
አይ ኤስ ቀድሞውንም የእስልምና እምነትን አይወክልም። ለመሆኑ በየቀኑ በአይ ኤስ ጥይት የሚለበለቡት ኢራቃውያን፣ ሶሪያውያንና የመናውያውያን ሙስሊም አይደሉምን? ከነህይወቱ ያቃጠሉት ዮርዳኖስያዊው ፓይለትስ ሙስሊም አይደለምን? እስልምና ሰላምን እንጂ አንገት መቅላትን የሚሰብክ እምነት ባለመሆኑ፣ በየትኛው ንፁህ ዜጋ ላይ የሚፈፀም ግድያ በመላ የሰው ልጆች ላይ እንደተፈፀመ የሚቆጥረውን፣ አንዲትን ነፍስ ያዳነን የሰው ልጆችን ሁሉ እንዳዳነ የሚያስበውን የእስልምና እምነትና አስተምህሮ ከአይ ኤስ ጋር ለማስተሳሰር መሞከር ፍትሃዊ አይደለም። የአረብ አገራትን ጨምሮ በሌሎች በርካታ አገራት የሚኖሩ ሙስሊሞችም የአይ ኤስ የጥፋት ድርጊትን በተደጋጋሚ በይፋ አውግዘውታል።
እውነት ነው አክራሪዎች ከዚህ አይነት የጭካኔ ተግባራቸው ጎን የሚሰለፍ ሃይል ለመመልመል ያመቻቸው ዘንድ ሃይማኖታዊ የሚመስሉ አጀንዳዎችን ያነሳሉ፡፡ ነገር ግን ይህ እንደሚያጠልቁት ጥቁር ጭምብል ድብቅ አጀንዳቸውን የሚከልሉበት መፈክር እንጂ እውነተኛ ባህሪያቸው አይደለም። ስለሆነም የአክራሪና ሽብርተኛ ቡድኖች ድርጊት አዕምሯችንን ሰልቦት በስህተትም ይሁን በእምነቶች መካከል ቁርሾ ለመፍጠር በእውቀት የሚደረጉ መሯሯጦችን አምርሬ አወግዛለሁ፡፡
ሁለተኛው ከአይ ኤስ እኩይ ድርጊት እኩል የማወግዘው ጉዳይ በየጊዜው በውጭ ሃይሎች ሰለባ በሆኑ ኢትዮጵያውያን ስደተኞች ነፍስ ላይ የሚደረግን የፖለቲካ ቁማር ነው። ባለፈው ሳምንት በደቡብ አፍሪካ አንዳንድ የዙሉ ጎሳ አባላት የፈፀሙትን ድርጊት መነሻ በማድረግ ድርጊቱን እጅጉን በማጋነንና አድማሱን በማስፋት የፖለቲካ ትርፍ ለማግኘት ሲራኮቱ የነበሩ ሃይሎችን ተመልክተናል። እነዚህ ቁማርተኞች ቁጥሮችን በማብዛት፣ የሃሰት ምስሎችን በመቀላቀል፣ እውነታዎችን በማጣጣል የነበራቸው ስምሪት ሲታይ የቁማር መጫዎቻ ሜዳው ከሰፋላቸው ለእነሱ ግብ ስኬት የሰው ህይወትን ለማስያዝ የማይመለሱ ጨካኞች መሆናቸውን በግልፅ አሳይተዋል። የጭካኔው ልካቸው ከተመዘዘ የአጥፊዎቹን ያክል የሚረዝም መሆኑን ነው ያረጋገጡት።
የኢትዮጵያ መንግስት የሚሰጣቸውን መረጃዎች፣ ያወጣውን የውግዘት መግለጫ፣ የአገሪቱ መንግስት እርምጃ እንዲወስድ ያቀረበውን ጥያቄና ዜጎች ወደ አገራቸው እንዲመለሱ የፈጠረውን ምቹ ሁኔታ በማጣጣል በደቡብ አፍሪካ ላይ መንግስት የበቀል እርምጃ እንዲወስድ መጎትጎት የጤንነት ምልክት አይደለም፡፡ አንዳንዶቹበአፍሪካ ሃያል የተባለው ሰራዊት ለምን ወደ ደቡብ አፍሪካ አይዘምትም?’ እያሉ ሲያላግጡ ሌሎችአዲስ አበባ ያለው የደቡብ አፍሪካ ኤምባሲ ካልተዘጋ ብሄራዊ ክብራችን አይመለስም የተወሱት ደግሞእዚህ ያሉት ደቡብ አፍሪካውያን ካልተባረሩ’  በማለት ሲቀውጡ መስማት እነዚህ ሰዎች እንኳን ለአገር የሚጠቅም ለያዙት የፖለቲካ አቋም እንኳን የሚመጥን ብስለት እንደሌላቸው የሚያሳብቅ ነው።
በደቡብ አፍሪካ የዙሉ ጎሳ የተወሰኑ ወሮበላዎች ሰርተው ባለፈላቸው አፍሪካውያን ስደተኞች ላይ የሰነዘሩትን ጥቃትና ዘረፋ ልክ ደቡብ አፍሪካና ህዝቦቿ ተስማምተው የፈፀሙት ተግባር በማስመሰል የእኛን ያክል ሰብዓዊነትና ሉዓላዊነት ያላቸውን ህዝቦች፣ የእኛ የምንላትን አገር ያክል ክብርና ልዕልና ያላትን አገር ሲያራክሱ ተመልክተናል፣ ይህ በየትኛውም ሚዛን ቢለካ ተገቢ አይደለም።
አይ ኤስ በሊቢያ በኢትዮጵያውያን ላይ የፈጸመውን ድርጊት በተመለከተ የሚሰጡ አስተያየቶችም የዚሁ ሌላ ግልባጭ ናቸው። በርግጥ የተፈፀመው ድርጊት አበሳጭ ነው፣ ግለሰቦችንም ስሜት ውስጥ ሊከት እንደሚችል እሙን ነው። በዚህ ወቅት ስሜታዊነት ምክንያታዊነታችን አሸንፎት ያልተገባ ነገር ብንናገር፣ የተሳሳተ አቋም ብንይዝ ተፈጥሯዊ ነው። ሰው በስሜት ውስጥ ሲሆን የሚናገረውን ነገር መለስ ብሎ ማሰላሰል ከዛም ያልተገባውን ንግግር ማረም ሲገባ ተደማሪ ስህተት መፍጠር ግን ሰዋዊ አይደለም።
የኢትዮጵያ መንግስት የተፈጠረውን ጉዳይ በተመለከተ በሰጠው መግለጫ ድርጊቱን ኮንኗል። አይ ኤስ ኢትዮጵያውያንን ስለመግደሉ መናገሩን እንጂ ሰዎቹ በእርግጥ ኢትዮጵያውያን ስለመሆናቸው እንዳላረጋገጠ፣ ጉዳዩን ግን እያጣራ እንደሆነ ገልጧል። ኢትዮጵያዊ ይሁኑም ሌላ ዜጋ ተግባሩን እንደሚያወግዝ አክሎ አስታውቋል። ለነገሩ መንግስት ባለው መሰረትም ጉዳዩን አጣርቶ 24 ሰዓት ውስጥ ዳግመኛ መግለጫ ሰጥቷል።
የመጀመሪያውን መግለጫ ተከትሎ ብዙ ማህበራዊ ድረ ገፅ ተጠቃሚዎችአይ ኤስ በራሱ አረጋጦ ሳለ የኢትዮጵያ መንግስት እንዴት እንዲህ ይላል?’ ሲሉ ለሰማቸው ድርጊቱን በአካል ተገኝተው ያስፈፀሙ ነው የሚያስመስልባቸው። ለመሆኑ አይ ኤስ የተናገረውን ሁሉ የአንድ አገር መንግስት ቀርቶ እኛስ ብንሆን እንደወረደ መቀበል አለብን እንዴ? ለመሆኑ ይህአረመኔእያልን የምንጠራው ቡድን ንጹሃን ዜጎችን ለመቅላት ወደኋላ ያላለ ለፕሮፓጋንዳ ዘመቻው ሲል ውሸት እንደማይናገር ያመንነው በምን አመክንዮ ነው? መንግስት የሰጠው መግለጫ ይልቁንም ጉዳዮችን ሳያጣራ፣ በነፈሰበት የሚነፍስና ሃላፊነት የማይሰማው መንግስት አለመሆኑን የሚያረጋግጥ ነው።
መንግስት የሟቾቹን ኢትዮጵያዊነት አጣራለሁ ማለቱ በምን ሂሳብ በቁስላችን ላየ ጨው መነስነስ እንደሆነ ሳይናገሩ በድፍኑ እርግማንን ማዝነብ ቀናት ሲያልፉ ለትዝብት ይዳርጋል። መንግስትመግለጫውን እስከማጣራ ድረስበሚል ድርጊቱን ባይኮንን ኖሮ በርግጥም እንደተባለውጨው መነስነስበሆነ ነበር፡፡ በተቃራኒው ግን በመግለጫው ላይ እንደተመለከተው ተጠቂዎቹ ኢትዮጵያዊ ይሁኑም የሌላ አገር ዜጎች መንግስት ድርጊቱን አውግዟል። በግፍ የተገደሉት ዜጎቻችን ከእኛው አብራክ የወጡ መሆናቸው ሃዘናችንን ድርብ ያድርገው እንጂ እኛም ከዜግነት ቀድሞ ለማንኛውም ሰብዓዊ ፍጡር በቀለሙም ይሁን በእምነቱ የተነሳ እንዲህ አይነት አሰቃቂ ወንጀል ሲፈፀምበት ማዘን ነው የሚገባን።
በሌላ በኩል የመንግስትን መግለጫ ከኢትዮጵያ ብሮድካስቲንግ ኮርፖሬሽን /ኢቢሲ/ ጋር በማስተሳሰርሁሉም ሚዲያ ኢትዮጵያውያን ስለመገደላቸው እየዘገበ ባለበት ኢቢሲ ኢትዮጵያዊ መሆናቸውን አላውቅም አለበሚል የስም ማጥፋት ዘመቻ ተካሂዷል። ይህ ደግሞ ከእውቀት ነፃ የሆነ ትችት ነው። የሰለጠኑት ሚዲያ የዘገቡትማአይ ኤስ እንዳለውእያሉ ነው። ስም ያላቸውን አለም አቀፍ ሚዲያ ለምሳሌ የዴይሊ ሜይል፣ ቴሌግራፍ፣ ሃፊንግተን ፖስት፣ ሮይተርስ፣ ኤፍ ፒ፣ ወዘተ --- ዘገባን ማየት ይቻላል። እንደውም ለዚህ ዘገባ ሰፊ ሽፋን የሰጡት ኤፍፒ እና ሮይተርስ በአይናችንን ያየነውን ቪዲዮ ሳይቀር በገለልተኛ ወገን ባይረጋገጥም…” ወይም “The video, released via militant social media accounts and websites, could not be independently verified by The Associated Press.”, “Reuters was unable to verify the authenticity of the video,…”, “the video is not verified.” እያሉ ነው የዘገቡት፡፡ የመንግስት መግለጫም ሆነ የኢቢሲ ዘገባ ይሄንኑ አለም አቀፋዊ ደረጃ የጠበቀ ነው።
ለአይ ኤስ እነዚህን ሰዎች ለመግደል ኢትዮጵያዊ መሆናቸው ብቻ በቂ ምክንያት ሆኖለታል። ለአይ ኤስ ኢትዮጵያ ማለት የክርስቲያኖች አገር ብቻ ነች። እናም ከእነዚህ ሰለባዎች ውስጥ ሙስሊሞች ስለመኖራቸው እንኳን ለማጣራት አልሞከረም፣ አይፈልግምም። ምክንያቱም የእሱ አላማ እስልምናን የመጠበቅ ሃይማኖታዊ ተልዕኮ ሳይሆን እስላማዊ መንግስት የመመስረት የፖለቲካ አጀንዳ ነው። ኢትዮጵያ ግን የሙስሊሙም፣ የክርስቲያኑም፣ የሌላውም እምነት ተከታዮች አገር ነች። እስካሁን የሞቱት ኢትዮጵያውያን መሆናቸው እንጂ ሁሉም ክርስቲያን መሆናቸውን የሚያረጋግጥ መረጃ አላየሁም። በሌላ አነጋገር አይ ኤስ ኢትዮጵያውያን ክርስቲያኖችን ከኢትዮጵያውያን ሙስሊሞች ነጥሎ ስለመግደሉ የተዘገበ አላነበብኩም። እናም በእኔ እምነት የአንዲት አገር ልጆች የሆኑ ሙስሊም፣ ክርስቲያንና ሌላ እምነት ተከታዮች በአንድነት ደማቸው ፈሷል። ሃዘናችንም ለእነዚህ ሁሉ መሆን አለበት።
ለማንኛው እኛን እዚህ አገር ውስጥ የሚያነታርክን ጉዳይ በስደት አጣብቂኝ ውስጥ ላሉት ወገኖቻችን የሚፈይድላቸው ነገር የለም። መፍትሄው ለብሄራዊ ውርደታችን መንስኤ የሆነውን ድህነትና ኋላቀርነት ማስወገድ ነው። ዜጎቻችን ከእንዲህ አይነት ከሰብዓዊነት በታች የሆነ ድርጊት የመጠበቅ ዋስትና የሚሰጣቸው አገራችንን በስደት ከሚያስጠጉን ሃብታም አገራት ተርታ እንድትሰለፍ የጀመርነውን ጥረት ዳር ማድረስ ነው። አገራችንን ማበልፀግ ደግሞ የእኛው የአሁኑ ትውልድ ሃላፊነት እንጂ ሌሎች አልምተዋት ስታበቃ ተመልሰን የምንገባባት አይደለችም፡፡ ስደት ይብቃ በማለት ሰርቶ ለመለወጥ የተመቻቹ እድሎችን አሟጠን መጠቀም ይኖርብናል።
እስከዚያውም ቢሆን ግን በንጹሃን ዜጎች ላይ የሚፈጠርን ሽብርና አክራሪትን መከላከል የምንችለው በመካከላችን የፀብ ግድግዳ በማቆም ሳይሆን ከምንም በላይ የሆነ ሰብዓዊነታችን አንድ ሲያደርገን ነውና በዜጎቻችን ላይ የተፈጠረውን ዘግናኝ ድርጊት ከእምነትና ከቀለም ድንበሮች ተሻግረን በጋራ ማውገዝ አለብን። በአገር ውስጥ ብቻም ሳንወሰን አለም በሽብርተኝነት ላይ የሚያደርገውን ትግል ይበልጠ መደገፍ አለብን። ሰልፋችን ከመላው አለም ሰላም ፈላጊዎች ጋር ነውና።
Post a Comment