Saturday, June 8, 2013

“ይህ ባንዲራ የኛ እንዳልሆነ አታውቁምን?”

የሰማያዊ ፓርቲ የተቃውሞ ሰልፍ አሁንም አነጋጋሪነቱ ቀጥሏል፡፡ በሰልፉ ወቅት የብዙዎችን ቀልብ ያልሳበው ነገር ግን በኢትዮጵያ ቴሌቪዥን ዜናው ከታየ በኋላ ብዙዎችን በማህበራዊ ድረ-ገፅ እያነጋገረ ያለው የሰንደቅ አላማው ጉዳይ ነው፡፡
አሁን አሁን እንደማነበው ነገሩ እየተጋነነና እየተዛባ የሚነገርበት ሁኔታ ነው ያለው፡፡ ራሱ ወያኔ ሰማያዊ ፓርቲን በህዝብ ለማስጠቆር በገንዘብ ሰዎችን ገዝቶ የፈፀመው ሴራ ነው ከሚሉት አንስተው ሰንደቅ አላማዋን በእግራቸው ሲረጋገጧት አይቻለሁ እስከሚሉት ፅንፎች ድረስ ማለቴ ነው፡፡
በእለቱ በተላለፈው የኢቲቪ ዜና ላይ ሰልፈኞች ሰንደቅ አላማዋን ሲያጎሳቁሏት ይታያሉ፡፡ መነሻው ምንድን ነው? ለምንድንስ አጎሳቆሏት? ባንዲራዋንስ ማን አመጣት? የሚሉትን ጥያቄዎች ማንሳት ተገቢ ነው፡፡ በኔ እምነት እነዚህን ጥያቄዎች በትክክል ለመመለስ ከድርጊቱ ፈፃሚዎች ቀጥሎ ከኔ የሚቀርብ ሰው የለም፡፡

ይህ ድርጊት የተፈፀመው ፒያሳ ከሚገኘው አፍሪካ ወርቅ ቤት ፊት ለፊት ነው፡፡ ከግንፍሌ እየገነፈለ የመጣው ሰልፈኛ ቁልቁል ሲንደረደር ከወደ መርካቶ የመጣው የድጋፍ ሃይል /ይህ ሃይል በኋላ ዋናው ሃይል ሆኗል/ ወደ ላይ እየተመመ ነበር፡፡ ከመርካቶ አቅጣጫ አራት ወጣቶች የኢፌዲሪ ሰንደቅ አላማን ወደጎን ዘርግተው ለአራት ይዘዋት መጡ፡፡
ወደ ዋናው ሰልፍ ሊቀላቀሉ በግምት 100 ሜትር ሲቀራቸው ከሰልፉ አስተባባሪዎች አንዱ ወደነሱ ሲሮጥ መጣና “ይህን ባንዲራ ለምን ይዛችሁ መጣችሁ? የኛ እንዳልሆነ አታውቁም?” እያለ በቁጣ ደነፋባቸው፡፡ ወጣቶቹም ርስ በርስ መተያየት ጀመሩ፡፡
እኔ ይህ ክስተት ሲፈጠር ምስል ቀራጩ ባልደረባዬ የቪዲዮ መቅረጫ ካሴቱ እያለቀበት ስለነበር ሌላ ላመጣለት ከፊት ወደቆመው መኪናችን እየተጣደፍኩ ነበር፡፡ ይህን ክስተት ሳይ ግን ጮማ ዜና እንዳገኘሁ ስድስተኛው የስሜት ህዋሴ ነገረኝ፡፡ እናም በቅርብ ርቀት ወደነበረዉ ካሜራ ማን በፍጥነት ተመልሼ እያጣደፍኩ ያንን እይታ እንዲወስድ ነገርኩት፡፡ እርሱም ወዲያው የተፈጠረውን ግርግር በካሜራው ቀለበው፡፡
የተወሰኑት ባንዲራዋን ይዘው ሲጨቃጨቁ የተወሰኑት ደግሞ እኛ ይህንን ክስተት እንዳንቀርፅ እየከለከሉን ነበር፡፡ በብዙ ትግል የተወሰነች እይታ ከቀረፅን በኋላ ካሜራችንንም በጣም እገፈተሩት ስለነበር አቆምን፡፡
ከሰልፈኞቹ አንዱ “አሁን እኛ ስንጋጭ መቅረፃችሁን ጋዜጠኝነት ፕሮፌሽን ይፈቅደዋል” እያለ ሲነተርከኝ እንደነበርና “እኔም እባክህ የቱን የቱን እየመረጥን መቅረፅ እንዳለብን አሳየን” ስል እንዳሾፍኩበት አስታውሳለሁ፡፡
በዚህ አጋጣሚ ቀድሞ የአንድነት ለፍትህና ለዲሞክራሲ ፓርቲ የወጣቶች ክንፍ አባል የነበሩና አሁን በሰልፉ ውስጥ በንቃት ሲሳተፉ ያገኘኋቸው ወጣቶች ተዋቸው ይቅረፁ በማለት ላደረጉልኝ ድጋፍ ላመሰግናቸው እወዳለሁ፡፡
Post a Comment