Thursday, May 23, 2013

ሰማያዊ ፓርቲ


ባለፈው አመት በተካሄደው የአፍሪካ ህብረት ስብሰባ ወቅት የእስልምና እምነትን ሽፋን ያደረጉ ሃይሎች "ጉባዔው ሲካሄድ ከመላው አለም ለመጡ መሪዎችና ለመገናኛ ብዙሃን ድምፃችንን ለማሰማት ከየአካባቢው ተሰባስባችሁ አዲስ አበባ ላይ ክተቱ" በሚል ያስተላለፉት አዋጅ መንግስትን አስከፍቶ ነበር፡፡


ያኔ ነገሩ አላማረም፤ እንዳይሆን ሆኖ ሰልፉም ተበላሸ፡፡ የያኔዎቹ ታዲያ ከስህተታቸው የተማሩ ይመስላሉ፡፡ በየሳምንቱ አርብ በሶላት ወቅት የሚነገቡ መፈክሮችን እየቀረፀ በማኅበራዊ ድረ-ገፆች የሚያሰራጭ አንድ የፌስቡክ ገፅ "ነገ አዲስ አበባን ሳይጨምር በመላ አገሪቷ የሚካሄደውን የተቃውሞ መርሐግብር ለማሳካት የሚደረጉ ዝግጅቶች በመልካም ሁኔታ ላይ ይገኛሉ" ሲል ዛሬ በግድግዳው ላይ ለጥፏል፡፡  

ይህ የሚያሳየው ለእንግዶቹ ክብር ሲባል ከአርብ ጀምሮ አዲስ አበባ ላይ ብቻ ሃይማኖትን መሰረት ያደረገ ሰልፍ ወይም ግርግር እንደማይኖር ነው፡፡ ይህ ድረ-ገፅ በስቅለት እለትም ለክርስትና እምነት ተከታዮች ሰላም ስንል የዛሬውን ተቃውሞ አንስተናል የሚል ፅሁፍ እንዳስነበበን አስታውሳለሁ፡፡
  
በአንፃሩ ሰማያዊ ፓርቲ ይህ ዝምታ የተመቸው አይመስልም፡፡ ዛሬ ባወጣው መግለጫ "ሰልፉን ለማድረግ እስከ አሁኗ ሰዓት ድረስ በህግ በኩል የጎደለ አንድም ቅንጣት ነገር ባለመኖሩ ሰልፉ በታቀደው ቦታና ሰዓት የሚካሔድ መሆኑን {ሰማያዊ ፓርቲ} ያሳውቃል" ብሏል፡፡

በነገራችን ላይ ሰማያዊ ፓርቲ መማር ያልቻለው ከሌሎች በጎ ተግባር ብቻ ሳይሆን ከራሱም ስህተት ነው፡፡ ከአራት ወር በፊት የተከለከለን ሰልፍ ህጋዊ አስመስሎ በመንቀሳቀሱ 43 ያክል ሰልፈኞችን ለእስር ዳርጎ ነበር፡፡

እኔ በርግጠኝነት ይሄ ነገር መንግስትንም ሆነ እንግዳ ተቀባዩን ህዝብ የሚያስከፋ ይመስለኛል፡፡ ድግሱን ሲበጠብጡበት ማን ዝም ይላል፡፡ 

ለዘለቄታው ችግራችንን በሰልፍ ሳይሆን በድርድር ብንፈታ፤ ያም እንኳን ባይሆን ይችችን አይነት ወሬ የሚፈልጉትን የውጭ ጋዜጠኞች ለብቻ ሰብሰብ አድርገን ብናዋያቸው፡፡ ይህም ካልተሳካ እንግዶቻችን ሲሄዱ ብንሰለፍም ያው ነው፡፡ ለእጀባው ከሆነ ማህበራዊ ድረ-ገፅ አለልን አይደል እንዴ፤ ኢሳትም አለ፡፡ 

እንግዲህ ምከረው ምከረው፤ እንቢ ካለ መከራ ይምከረው ከማለት ውጭ ምን ይባላል፡፡ 

ከምሬ ነው፡፡

Post a Comment