Thursday, March 28, 2013

ፀብ አጫሪ ስሞች(ክፍል አንድ)


ከጥቂት አመታት በፊት የወረዳ ፖሊስ ፅ/ቤት የሰራዉ ጥናት እንደሚያለክተዉ በመንዝ ጌራ-ምድር ወረዳ ውስጥ ካሉ የወንዶች ስሞች መካከል 30 ከመቶ ያክሉ ሃይል የተቀላቀለባቸዉ፤ ፀብ አጫሪ ወይም ሰላም የሚነሱ አይነት ናቸዉ፡፡

ጥቂት የመንዝ አካባቢ ስሞችን እነሆ

በላቸው፤   ሽናባቸው፤   ድፋባቸው፤  ኩራባቸው፤  ቀማቸው፤   አጋጨው፤  ደምሰው፤ ዳምጠዉ፤  አምታታው፤  ጣሰው፤  ናደ፤  ዘርጋው፤  ቅጣው፤  ዳጨው፤  ጣልአርጌ፤  ሰጥአርጌ፤  ናቅአርጌ፤  ተምትሜ፤  እርገጤ፤  ደባልቄ፤ ገስጥ፤  አደፍርስ፤  አንበርብር፤   አስደግድግ፤  አሸብር፤   አደናግር፤  ደምመላሽ፤   ደፋር፤  አስጨናቂ፤   ሽብሩ...

በነገራችን ላይ ቁጥራቸ ቢያንስም መሰል የሴቶችን ስም ማግኘትም አይከብድም፡፡ ለምሳሌ በለጠች፤ አታለል፤ የሺመቤት፤ ላቀች፡ ወዘተ…፡፡ በነገራችን ላይ የኔም እናት ስሟ ላቀች ደፋር ነዉ፡፡ መንዜዎች ሌላም ካላችሁ ጨምሩበት፡፡

ከጎጃም በተለየ መልኩ በመንዝ አካባቢ የሚወጣ ስም ቤት እንዲመታ ወይም አረፍተ ነገር እንዲሰራ አይጠበቅበትም እንጅ ለጆሮ የሚሰቀጥጡ ስሞችን መስማታችን አይቀርም ነበር፡፡

እንደ በላይ ዘለቀ፤ ፍሬ ዘሪሁን፤ ለ ምሳሌ፤ በልእስኪ ወዳጄና ፍቅር ይልቃል አይነት ስሞች በጎጃም የተለመዱ ናቸዉ፡፡ ይህን አይነት ልማድ በመንዝ ቢኖር ኖሮ እንደ ቀምተህ በላቸዉ፤ ልአርገህ ሽናባቸዉ፤ ዘርጋና አጋጨዉ ያሉ ስሞችን በሰማን ቁጥር ስንደነግጥ መኖራችን አይቀርም ነበር፡፡

አሁን አሁን ግን እነዚህ አይነት ስሞች እየቀነሱ በአንፃሩ ሰላማዊና ዲሞክራሲያዊ ስሞች እየተስፋፉ ናቸዉ፡፡ እንደዉም እኔ ሳስበዉ እነዚህ ስሞች ባለፉት 10 አመታት ባለሁለት አሃዝ ፈጣን እድገት ሳያስመዘግቡ አይቀሩም /lol/፡፡

እነዚህ ስሞች በጥሬ ትርጉማቸዉ አመጽን፣ ውንብድናን፣ ዝርፊያን፣ ሰው መግደልን በጥቅሉም ወንጀልን የሚያበረታቱ ናቸ፡፡ በስሞቹ መጠን በአካባቢዉ የወንጀል ድርጊት የተስፋፋ ነ ለማለት ባይቻልም የአሸናፊነትና የጀግንነት ፅንሰ ሃሳብን አረዳድ ላይ ግን አሉታዊ ተፅዕኖ ማሳደራቸዉ አልቀረም፡፡

በርግጥ ለዚህ ችግር ምክንያቱ ስሞች ብቻ ሳይሆኑ በአካባቢዉ የሚነገሩ ስነ ቃሎችም ናቸዉ፡፡ በክፍል ሁለት ፅሁፌ በአካባቢዉ ለወንጀል የሚያነሳሱ ስነቃሎችንና ማጠቃለያ ሀሳቤን ይዣለሁ፡፡

ምስጋና፤ የጥናቱን መሰረታዊ ነጥቦች እንዳስታስ ያገዘኝን ኢንስፔክተር እሸቱ ጌታቸን በዚህ አጋጣሚ ማመስገን እፈልጋለሁ፡፡

Friday, March 22, 2013

ኢትዮጵያም በተራዋ


ከሰሞኑ ከአመት በፊት በሌላ ሃገር ጥቅም ላይ የዋለን የአንዲት ፊቷ ላይ ጥቃት የደረሰባት ወጣት ሙስሊም ፎቶ የኢትዮጵያዊት በማስመሰልና የኢትዮጵያ ወታደሮች የደበደቧት ነች በማለት በሃሰት የተሰራጨ ዘገባ ነበር፡፡

ጤናና ብርታትን ለዳንኤል ብርሃኔ  ይስጠውና ይኽኑ የሀሰት ጉድ አጋልጦ በማሳየት ውሸታሞቹን አንገት አስደፍቷቸዋል፡፡ ዳንኤል ምስሉን አይተው ያመኑትንና ጥርጣሬ የገባቸውንም ሆነ ውሸት እንደሆነ ቀድመው ያወቁትን ሁሉ በዚሁ ፖስት ትክክለኛ ግንዛቤ ማስያዝ ችሏል፡፡
በዚህ ሳምንት የተፈበረከዉ አሉባልታ ደግሞ ግማሽ አካሏ የሰው፤ ግማሽ አካሏ የዘንዶ የሆነች ፍጡር የህዳሴው ግድብ በሚገነባበት አቅራቢያ በኢትዮጵያና በሱዳን ድንበር ላይ ተገኘች የሚል ነው፡፡ ለዚህም ተያይዞ የቀረበ ቪዲዮ አለ፡፡
ይህ ቪዲዮ የተጫነበት ምክንያት የኢትዮጵያ ህዝቦች በአንድ ልብ ቆርጠው የተነሱለትን የግንባታ ሂደት በአፍራሽ ወሬዎች ማደናቀፍ ነው፡፡ ህዝቡ ይህንን “ከፈጣሪ የመጣ ቁጣ” አድርጎ እንዲያስብ በማድረግ የስነ ልቦና ጭንቀት ውስጥ መክተትን ያለመ ነው፡፡

Monday, March 11, 2013

ዉሸትና ስንቅ እያደር ይቀላል



ኢቲቪ ባለፈዉ ሰኞ ያስተላለፈዉን “የኛ ጉዳይ” ዉይይት ተከትሎ በአንድ የፌስቡክ ገፅ ላይ የወጣ ፅሁፍ ዉይይቱን ለማጣጣል ሙከራ ሲያደርግ በማስረጃነት ያቀረበዉ አሁን በሽብርተኝነት ወንጀል ተጠርጥረዉ ማረሚያ ቤት የሚገኙ ግለሰቦችን የቡድን ስም አጠራር ነዉ፡፡

ፅሁፉ ከአልሞት ባይ ተጋዳይነት ጥቂት ፈቀቅ ያለ ባይሆንም ቢያንስ የግል እምነቴን ለማንፀባረቅ ፈለግሁ፡፡

ፅሁፉ በዚህ ጉዳይ ላይ ቃል በቃል  እንዲህ ነዉ የሚለዉ፡፡ “ሕዝብ የወከላቸውን መንግስትም እውቅና ሰጥቶ ቀርቦ ያነጋገራቸውን ሕጋዊ ወኪሎች መንግስት እውቅና እንዳልሰጣቸው ዛሬ በይፋ ነግረውናል አቶ ሽመልስ {የመንግስት ኮሚዩኒኬሽን ጉዳዮች ፅ/ቤት ምክትል ሃላፊ}፡፡ በህግ አግባብ ስላለው ትንታኔ ረቺ የሆነ መረጃ ትንታኔ መስጠት የሚቻል መሆኑ እንደተጠበቀ ሆኖ መንግስት በራሱ አንደበት የህዝብ ወኪል እያለ ያስጠራበትን ዜና ከዚህ ሊንክ ስሙት http://www.bilaltube.com/awoliya-news-etv-news-about-awoliya-meeting video_68a8d90c5.html#sthash.AQw0Lure.iSy5OPkW.dpbs፡፡

ከዚህ በተጨማሪ በሌላ የፌስቡክ ገፅ የወጣ ፅሁፍም ተከታዩን ይላል፡፡ “አስገራሚው ነገር ‹‹በሙስሊሙ ህብረተሰብ የተወከሉ የኮሚቴ አባላት›› ብሎ ልክ የዛሬ አመት ዜና የሰራውና ድርድራቸውንም በዜና ያሰራጨው ኢቴቪ አሁን ልክ በአመቱ ተመራጭ ኮሚቴዎቹን ‹‹አሸባሪ›› እንዲሁም በህዝብ ያልተመረጡ እንደሆነ ሲገልጽ ተመልክተነዋል፡፡ በመንግስት የተወከሉት ግለሰብም መንግስት ከእነዚህ ሰዎች ጋር ተደራድሮ አያውቅም ሲሉ በአደባባይ ክደዋል፡፡