Tuesday, January 29, 2013

ግልፅ ደብዳቤ ለጆን ኦቢ ሚኬል


ቀንደኛ የቸልሲ ደጋፊ ነኝ፡፡ ቸልሲ በ2008 በማንቸስተር ዩናይትድ ተሸንፎ ዋንጫዉን ሲነጠቅ ራቴን ሳልበላ አድሬያለሁ፡፡ በማግስቱም የምግብ ፍላጎቴ መዘጋቱን አልረሳዉም፡፡ አምና ባርሴሎናን አሸንፎ የቻምፒዮንስ ሊጉን ዋንጫ ሲያነሳ ደግሞ ፊቴ በደስታ እንባ ታጥቧል፡፡ ሞሪንሆ ከክለባችን ሲሸኝ ሰማይ የተደፋብኝ ያክል ደንግጬ ነበር፡፡ /ይህን ደብዳቤ ከፃፍኩ በኋላ ተመልሷል፡፡/

እዉነቱን ልንገርህና ሌሎቹን ቀርቶ አዳነ ግርማንና ሳላዲን ሰይድን እንኳን በመልካቸዉ ለይቸ አላዉቃቸዉም /አሁን እንኳን እየለየኋቸው ነው/፡፡ አንተ ግን ስትከሳና ስትወፍር እንኳን ለዉጥህን በሚገባ እለየዋለሁ፡፡ አንተ ታክል ገብተህ ተቃራኒህን ስትጥለዉ ሰዉነቴ በድንጋጤ ይሸማቀቃል፡፡ ለወደቀዉ አዝኜ ሳይሆን ትንሽ ጫር አድርጎህ ተም እንዳትጎዳ እየሰጋሁ ነዉ፡፡

ስለ ኢትዮጵያ ሊግ የደረጃ ሰንጠረዥ ከምትጠይቀኝ ስለ ቸልሲ ተጫዋቾች የምግብ ምርጫ ብጠይቀኝ መልሱ አይከብደኝም፡፡ አንድም ቀን እዛ የምታዉቀዉ የአዲስ አበባ ስታዲየም ገብቸ የሀገሬን ክለቦች ጨዋታ አይቼ አላዉቅም፡፡ የቸልሲን ጨዋታ ለማየት ግን የልጄን የልደት በዓል አቋርጬ ወጥቻለሁ፡፡

ቼልሲን ከልብ እወደዋለሁ፡፡ አንተ ደግሞ የቼልሲ ሞገሱ ነህ፡፡ በኔም ልብ ላይ ነግሰሃል፡፡ እወድሃለሁ፡፡ እንቅፋት እንኳን እንዲመታህ አልመኝም፡፡ ይሄ የተጋጋጠ የአፍሪካ ሜዳ ለወለምታ እንኳን እንዳይዳርግህ ስፀልይ ነዉ የከረምኩት፡፡

ዛሬ ግን ፈተናዉ እጅግ ከብዶብኛል፡፡ ኢትዮጵያን በጣም እወዳታለሁ፡፡ ሀገሬን ከማንምና ከምንም በላይ እመርጣለሁ፡፡ በጣም የምሳሳላት ሀገሬ ደግሞ ዛሬ ከወዳጄ ጆን ኦቢ ሚኬል ጋር ተፋጣለች፡፡ ቢቸግረኝ ለሀገሬ ድል፤ ለአንተ ደግሞ ጉዳት እንዳያገኝህ ተመኘሁ፡፡ ሚኬል፤ አዉቃለሁ ለአንተ ማሳነሴን አልዘነጋሁትም፡፡ ድል ያልተመኘሁልህ ሳልወድህ ቀርቼ አይደለም፡፡ ይቅር በለኝ የሀገሬ ጉዳይ ሆኖብኝ ነዉ፡፡

ሚኬል፤ እክህ ከቻልክ ዛሬ አትሰለፍ፡፡ ከተሰለፍክም እባክህ ኢትዮጵያን በክፉ አይንህ እንዳታያት፡፡ አንድ የሀገሬ ተጫዋች አንተ ላይ ጉዳት ቢያደርስብህ አምርሬ እጠላዋለሁ፡፡ አየር መንገድ ሄጄ ቡድኔን የመቀበል እቅዴንም በዚሁ የተነሳ መሰረዜ አይቀርም፡፡ አንተም ታዲያ እንድጠላህ እንዳትፈቅድልኝ፡፡ በአንተ ጎል ወይም በአንተ የተነሳ ኢትዮጵያ ብትሸነፍ የወደድኩህን ያክል ነዉ የምጠላህ፡፡ ደግሜ አለምንሃለሁ፤ እባክህ እንድጠላህ አትፍቀድልኝ፡፡

እንደዉም ከቻልክ ቪክቶር ሞሰስንም ምከረዉ፡፡ ኢትዮጵያ ላይ እየዛተ ነዉ ሲሉ ሰምቻለሁ፡፡ እሱ እንኳን ልጅም ስለሆነ ይሆናል ለማመዛዘን ይከብደዋል፡፡ አንተ ግን የአንድ ደጋፊ ዋጋ ታዉቀዋለህና አደራህን ልመናዬን ቸል እንዳትለዉ፡፡

በል ደህና ሁን፡፡ መልካም ጨዋታ ይሁንልህ፡፡ ነገ ደግሞ የምስጋና ደብዳቤ እፅፍልሃለሁ፡፡

አክባሪህ ከበደ ካሳ
አዲስ አበባ
Post a Comment